ፈርኦናዊነት

Hailemariam-Desalegnሰው ከመጽሐፍ ቢቀር ከእድሜው፣ ከእድሜው ቢቀር ከወዳጆቹ/ጎረቤቶቹ፣ ከነሱ ቢቀር አለትን ወደ አፈር በሚለውጠው ጊዜ፣ ከእርሱም ቢቀር ጨለማና ብርሃን ከሚፈራረቁበት የጠፈጥሮ ዑደት… እንዴት አይማርም?
 
በእኔ እምነት ይሄ ስርዓት እንኳን አሁንና ድሮም ያልፈረሰ፣ በከባድ ችግር ውስጥ እንኳን ገብቶ የማይፈርስ ስርዓት ነው። ስለዚህ በአለት ላይ የተመሰረተ ስርዓት አለን ብሎ ማመን ጠቃሚ ይሆናል። ….በዚህ ሂደት ውስጥ የተሳተፉ አካላትን ያለምህረት ህግ የማስከበር ስራችንን ማከናወን የሚገባን ይሆናል። መንግስት የህግ የበላይነትን ለማስከበር ሁሉንም አቅሙን ይጠቀማል። በእኔ በኩል ይህ የህግ የበላይነት እንዲከበር ለማድረግ ሁሉም የጸጥታ አካሎቻችን ህግ የበላይነትን እንዲያስከብሩ አዝዣለሁ።
ብሏል (ጠ/ሚ?) ኃይለማርያም ደሳለኝ
እንግዲህ ትዕዛዝ ማንበብ ነበርና ስልጣኑ’አለሁ’ ለማለት ጊዜ ተራው ደርሶት መሆኑ ነው ሕዝብ ለመፍጀት ትዕዛዝ ያስተላለፈው፡፡ ይሄ መቼም የሚረሳ ጉዳይ አይደለም!
 
ቃል በቃል ገልብጬው ደጋግሜ አነበብኩት። ደጋግሜ ነፈርኩኝ። የሰው ልጅ አእምሮ እንዴት በዚህ ደረጃ ሊደነዝዝ ይችላል? መቼስ ያደገ አገር ሰዎች ብንሆን እንዲህ ያለውን ሰው ሰብስበው ጥናት መከናወኑ አይቀርም ነበር።
 
“ፀጉራም ውሻ አለ ሲሉት ይሞታል” ነበር ተረቱ። “ፀጉራም ውሻ ሞቶም ሲታይ ጣረ ሞቱ ‘አለሁ’ ይላል” እንበለው ይሆን?!
.
.
ሰውዬው በሀይማኖተኛ ማሊያም እንደሚጫወት ትዝ ቢለን፥ ከመጽሐፍ ቅዱስ የፈርኦንን ታሪክ እናስታውሳለን….
 
“እግዚአብሔር እንደ ተናገረ፥ የፈርዖን ልብ ጸና፥ አልሰማቸውምም። እግዚአብሔርም ሙሴን አለው፦ የፈርዖን ልብ ደነደነ፥ ሕዝቡንም ለመልቀቅ እንቢ አለ።” (ኦሪት ዘጸአት 7፥ 13-14) “ግብፃውያንም፥ የፈርዖን ፈረሶችና ሰረገሎች ፈረሰኞቹም ሁሉ፥ እያሳደዱ በኋላቸው ወደ ባሕር መካከል ገቡ።” (ኦሪት ዘጸአት 14፥23)
 
“የሰው ልጅ ሆይ፥ ስለ ግብጽ ንጉሥ ስለ ፈርዖን ሙሾ አሙሽ፥ እንዲህም በለው። የአሕዛብን አንበሳ መስለህ ነበር፥ ነገር ግን እንደ ባሕር ዘንዶ ሆነሃል በወንዞችህም ወጥተሃል፥ ወኃውንም በእግርህ አደፍርሰሃል፥ ወንዞችህንም አሳድፈሃል።” (ትንቢተ ሕዝቅኤል 32፥2
 
“የመለስ መንፈስ ከኃይለማርያም ላይ ልቀቅ!” የምንልበት ጊዜ አልፏል። አሁን መንፈሱ ሙሉ ለሙሉ እንደተዋሃደው እያየን ነው። …እንግዲህ ሙሾ እያሞሸን ፍትህ ሲፈጸም የምናይበት ቀን ይመጣል! የሰው ልጅ ደም እንደው በከንቱ ፈሶ አይቀርም!
 
“ፈርዖንንና ሠራዊቱን በኤርትራ ባሕር የጣለ ምሕረቱ ለዘላለም ነውና!” (መዝሙረ ዳዊት 136፥15)
 

መጽሐፍት ሲያዞሩ…

n1704ፀሐፊውን… የቻሉትን አሰሩ፣ የቻሉትን አባረሩ፣ የቻሉትን ደግሞ ለማስፈራራት ላይ ታች አሉ። የቻሉትን የሚፈልጉትን እንዲጽፍ አድርገው እቅፍ ድግፍ አድርገው ያዙት።
 
የመጽሐፍትን መታተም ለማስታጎልና የፀሐፊዎችን ቅስም ለመስበር፥ የመጽሐፍት ህትመት ዋጋን በወረቀት እና በሰበብ አስባብኩ ከፍ አደረጉት።
 
ነባር መጽሐፍትን በጨረታ እስከመሸጥ ድረስ፥ የአገራዊና ወቅታዊ ጉዳዮች መጽሐፍትን ድራሽ ለማጥፋት የሚችሉትን ሁሉ አደረጉ። ከነሱ ሀሳብ የተለየው ላይ ሁሉ ጥርሳቸውን ነከሱበት።
 
“ለሽብር የሚያነሳሱ መጽሐፍት” ብለው በራሳቸው ጊዜ ተሸብረው፣ ሕብረተሰቡ እንዲሸበር እና ተሸማቆ እንዲኖር፣ ሲያነብም እንዲሳቀቅ አዋጅ አንጋጉ።
 
ይኸው ደግሞ፥ መጽሐፍ አዙረው እውቀትን በማስፋፋትና ራሳቸውን በመደጎም የሥራ መስክ ላይ የተሰማሩ ምስኪን መጽሐፍት አዟሪዎችን ማሰር ጀመሩ።
 
የሪፖርተር ጋዜጣ ዜና እንዲህ ይነበባል….

አመፅ ቀስቃሽ ናቸው የተባሉ መጻሕፍት በመሸጥ የተጠረጠሩ አዟሪዎች ታሰሩ

ኅብረተሰቡን ለአመፅ የሚገፋፉና ግጭት ሊፈጥሩ የሚችሉ መጻሕፍት በማዘዋወርና በመሸጥ የተጠረጠሩ መጽሐፍት አዟሪዎች፣ ከነሐሴ 14 ቀን 2008 ዓ.ም. ጀምሮ መታሰራቸው ታወቀ፡፡

ቁጥራቸው በውል ያልታወቁ መጻሕፍት አዟሪዎች በተለያዩ ፖሊስ ጣቢያዎች መታሰራቸውንና በፌዴራል የመጀመሪያ ደረጃ ፍርድ ቤት አራዳ ምድብ ተረኛ ችሎት ቀርበው ጊዜ ቀጠሮ እንደተጠየቀባቸው ቤተሰቦቻቸው ለሪፖርተር ተናግረዋል፡፡

አዟሪዎቹ የተጠረጠሩት ሕዝብ የሚያነሳሱና አመፅ የሚቀሰቅሱ መጣጥፎችን በፍትሕ ጋዜጣ ላይ በማተም ክስ ተመሥርቶበት የሦስት ዓመታት ጽኑ እስራት የተፈረደበት ጋዜጠኛ ተመስገን ደሳለኝ፣ በቅርቡ ‹‹የፈራ ይመለስ›› በሚል ርዕስ ያሳተመውን መጽሐፍ፣ ፕሮፌሰር ፍቅሬ ቶሎሳ ‹‹የኦሮሞና አማራ የዘር ግንድ›› በሚል ርዕስ ያሳተሙት መጽሐፍና ጋዜጠኛ ሙሉ ቀን ተስፋው ‹‹የዘመኑ ጥፋት›› በሚል ርዕስ ያሳተመውን መጽሐፍ በማዞር ሲሸጡ ስለተገኙ መሆኑ ተገልጿል፡፡

ጋዜጠኛ ተመስገን ቀደም ብሎ ክስ ተመሥርቶበትና ጥፋተኛ ሆኖ በመገኘቱ ቅጣት የተጣለበትን መጣጥፍና በድጋሚ በመጽሐፍ መልክ ያሳተመውን መጽሐፍ ማሠራጨት ወንጀል መሆኑን ፖሊስ ለፍርድ ቤት ማስረዳቱ ታውቋል፡፡ ሌሎቹም የተጠቀሱት መጻሕፍት አመፅ ቀስቃሽ መሆናቸውን በመግለጽ መሠራጨታቸው ተገቢ አለመሆኑን ፖሊስ ለፍርድ ቤት አስረድቶ፣ መጻሕፍቱ ሲታተሙ ያተማቸው ማተሚያ ቤት በመጽሐፉ ላይ መግለጽ የነበረባቸው ቢሆንም ሳይገልጹ መቅረታቸውንም አክሏል፡፡ ይኼም ሆን ተብሎ መንግሥት ቁጥጥር እንዳያደርግ በድብቅ የሚሠራ ሕገወጥ ተግባር መሆኑን በማስረዳት፣ ለተጨማሪ ምርመራ ተጨማሪ ጊዜ መጠየቁ ተገልጿል፡፡

የተወሰኑ አዟሪዎች መጻሕፍቶች ተነጥቀው ሁለተኛ እንዳያዞሩ ፈርመው መለቀቃቸውንና ማተሚያ ቤቱን እንዲጠቁሙ ተገደው እንደነበር ተናግረዋል፡፡ ሐሙስ ነሐሴ 18 ቀን 2008 ዓ.ም. ፍርድ ቤት ቀርበው ጊዜ ቀጠሮ የተጠየቀባቸው መጻሕፍት አዟሪዎች ሰኞ ነሐሴ 23 ቀን 2008 ዓ.ም. በድጋሚ ፍርድ ቤት እንደሚቀርቡ ታውቋል፡፡

አሜሪካ ድምጽ ሬድዮም ቀድሞ እንዲህ ዘግቦት ነበር…

መጽሐፍ አዟሪዎቹ በተለይ የተመስገን ደሳለኝ፣ የሙሉጌታ ሉሌና የዶ/ር ፍቅሬ ቶሎሳ መጽሐፍ መሸጥ እንዳልቻሉ እነዚህን መጽሐፍትና ሌሎች የታሪክና የፖለቲካ መጽሐፍት ይዘው ሲገኙ እንደሚደበደቡ፣ እንደሚታሠሩና አንዳንዴም ለመለቀቅ ከደንብ አስከባሪዎች ጉቦ እንደሚጠየቁ ተናገሩ።

‘መጽሐፍቱን ማዞር ወንጀል ቢሆን’ እንኳን፥ በጎልማሶች ት/ት (መሰረተ ትምህርት adult education) ፕሮግራም እንኳን ማንበብና መጻፍ ያላስተማሩትን ዜጋ ምን ብለው “አመጽ ቀስቃሽ” መጽሐፍ ይዘህ ዞረኻል ብለው ያስሩታል? ያዋክቡታል? ይቀጡታል?
“አህያውን ፈርቶ ዳውላውን” አሉ። ከቻሉ ሀሳብን ማሰሩን አይሞክሩትም ነበር?!

ህም!…ከምላስሽ ጸጉር!

ምን ያል እንቆቅልሽ ነው? ምን ያለ፥ የጊዜ ታ’ምር?
ካንድ ገጽ ላይ የሰው ልጅ፥ ልዩ ልዩውን ‘ሚቆፍር?
በመሳ የኑሮ መስመር፣ ያልሰፈረውን ሚያማትር?
እንደምን አስፈነደቀው፥ አንዱን ያስነባው መከራ?
ሌላውን “በለው” አስባለው፥ ለእናት የተባለ ሴራ?
 
እንደምን ሜዳ መሰለው፥ ለአንዱ የኾነው ተራራ?
ሜዳውስ እንዴት ዳገተ፥ እንደምን ታይቶ ተፈራ?
ዳገቱስ እንዴት መደደ፣ ገዳዩን ሽምጥ አስኬደ?
የጠላው ሰው ተሸልሞ፣ ወዳጅ እንዴት ተዋረደ?
 
ክቡር ሰውነት ለዓለሙ፥ እንደምን ላንዱ ቀለለ?
አንዱን ባስጨከነው ግፍ፣ እንደምን ሌላው ዋለለ?
 
የወገኑን ደም ሊያጎርፍ፥ እንደምን ወገን ታጠቀ?
ገላ ገላውን ሊወጋ፥ ምን ቢያዘው ጦሩን ሰበቀ?
 
ደም አይቶ አቅሉን የሳተው፣ ለለቅሶ እየማቀቀ፣
እንደምን ወገኑ ችሎ፥ ሰማዩ ዝቅ እስኪል ሳቀ?
 
አንዱን ያረገፈው አተት፣ አንዱን ያሻመደው መተት፣
እንደምን ሌላውን ጋርዶት፥ አለባብሶት ዋለ ኮተት?
 
ይኽ ነው ችሮታሽ በቃ?
ለታማኝ ልጆሽ ውለታ? ዘግኖ ማሸከም ሲቃ?
ይኸው ነው እናት ዓለም፥ የቃልኪዳንሽ ቀለም?
ገዳይ ደምቆ ሟች ሊለቀም?
ወዳጅ አመዳይ ለብሶ፣ ባንዳ በልዩ ሲቀልም?
በዋይታ ቤትሽ ሲያጣጥር፣ “እህህ” ወገን ሲታመም?
 
አይሆንም!
ህም!…ከምላስሽ ጸጉር!
 
አይኖርም ቀኑ ቆፍንኖ፣ ይነጋል አይቀርም ዳምኖ፥
ጠቋቁሮ ዶፉን ያዘንባል፣ ለጠላት መከራ ጭኖ፤
ያድጠዋል የቆመበት፥ ጽዋው ሲፈገነፍል ሞልቶ፣
ዋጋውን ያነሳል ዋትቶ፣ ትፍግፍጉ አየር ጠርቶ
ይመዘናል በሚዛኑ፥ ተቅበዝብዞ፣ ተንከራርቶትቶ፣
በግፍ ሲያድል እንደኖረ፣ በየምድረበዳው ዋትቶ፤
 
ወገን ሳይደግፍ ሳያቀና፣ አይቀር የሰው ገላ ጎብጦ፣
ሰውነትን ሳይገነባ፣ አይቀር የሰው ስጋ ቀልጦ፣
ላያወዛ ላያሳምር፣ አይቀር የንጹህ ደም አጥጦ፣
በኩራት ላያስጎማልል፣ አይቀር የቻይ ገላ ተረግጦ፤
 
ቃል ነውና!
ፋሽስት ቅሌቱን ሊረከብ፥ ከሰጠበት እጥፍ ቁና፣
አሸባሪው ተሸብሮ፣ ሕይወት በመልካም ሊቀና።
 
ህም!…ከምላስሽ ጸጉር!
 
/ዮሐንስ ሞላ/

ብሩን ራሱን ነው እንዴ አብስለው ሚበሉት?

መንግስታችን፥ ዘመኑ አላመች ብሎት እንጂ፣ በዚህ አያያዙ በይፋ የባሪያ ንግድ ሁሉ ቢጀምር አይበቃውም። (ያው ከሳውዲ ጋር ያለው ውል ሳይረሳ። …የነውራቸው ብዛት እኮ፥ ከሳውዲ ጋር እየተዋዋሉ፣ ከአውሮፓ ሕብረት ጋር ስደተኞች እንዳይሄዱ ብለው ብር ይቀበላሉ።) ብሩን ራሱን ነው እንዴ አብስለው ሚበሉት?
 
“ታንዛንያ ከጅቡቲ፣ሱዳንና ኬንያ በመቀጠል ከኢትዮጵያ ኤሌክትሪክ ሃይል የምታገኝ አራተኛዋ አገር ትሆናለች። …ኢትዮጵያ ከአፍሪካ ቀንድ ባሻገር ሩዋንዳና ብሩንዲ ለመሳሰሉ በጣም ውድና ታዳሽ ያልሆነ ኃይል ለሚጠቀሙ አገራት እንዲሁም ለሰሜን አፍሪካ፣ መካከለኛው ምስራቅና አውሮፓም የኤሌክትሪክ ኃይል የማቅረቡ ዕቅድ አላት።” ….ዜናው የኢዜአ ነው።
 
ኢትዮጵያ ደግሞ፥ መስመር ያልተዘረጋበት ሳይቆጠር፣ መስመር በተዘረጋባቸው አካባቢዎች መብራት ብርቅ ነው። መሀል አዲስ አበባ ዛሬም መብራት ሲመጣ በደስታ ይጮኻል። እናቶች ምጣድ ጥደው መብራት እየሄደባቸው፥ ሊጥ እየተበላሸባቸው፣ ጀሶ እና ሳጋቱራ ድብልቅ እንጀራ ሸምተው ቤተሰባቸውን እንዲመግቡ ተገደዋል።
 
ፋብሪካዎች እንደሚገባቸው አያመርቱም። (ያው አንዱ ቤተዘመድ እንዲከብር ያመጣው ጀነሬተር ተቸብችቦለት በሱ መጨናበስ አለ።) መብራት ባለመኖሩ ምክንያት ሥራ ፈትተው የሚቸገሩ ሰራተኞች አሉ። በጨለማ እየወደቀ የሚሞተው፣ የወንጀል ሰለባ የሚሆነው ተቆጥሮም አያልቅ። የመብራት ችግር ጣጣዎች ተዘርዝረው የሚያልቁም አይደሉም።
የኢዜአን ሙሉ ዜና ከታች አንብቡት….

ኢትዮጵያ ለታንዛኒያ 400 ሜጋ ዋት የኤሌክትሪክ ኃይል ለመሸጥ የሚያስችል ስምምነት ልታደርግ ነው

ኢትዮጵያ ለታንዛኒያ 400 ሜጋ ዋት የኤሌክትሪክ ኃይል ለመሸጥ የሚያስችል ስምምነት ልታደርግ ነው

አዲስ አበባ ነሀሴ 20/2008 ኢትዮጵያ ለታንዛኒያ 400 ሜጋ ዋት የኤሌክትሪክ ኃይል ለመሸጥ የሚያስችል ስምምነት ልታደርግ ነው።

የኢትዮጵያ ኤሌክትሪክ ኃይል ዋና ሥራ አስፈፃሚ ኢንጅነር አዜብ አስናቀ ለኢዜአ እንደገለጹት ሁለቱ አገሮች የሽያጭ ስምምነቱን በሚቀጥሉት ሳምንታት ያከናውናሉ።

ኢትዮጵያ ለታንዛኒያ የምታቀርበው የኤሌክትሪክ ሃይል በኬንያ በኩል የሚያልፍ በመሆኑ በኬንያና ታንዛንያ መካከል የሚደረግ ስምምነትም እንዳለ ገልጸዋል።

ከኢትዮጵያ የኤሌክትሪክ ኃይል ገዝተው መጠቀም የጀመሩት ሱዳን፣ጁብቲና ኬንያም ተጨማሪ ኃይል መጠየቃቸውን ኢንጅነር አዜብ ተናግረዋል።

አገራቱ ከውድና አካባቢን ከሚጎዳ የሃይል አጠቃቀም ይልቅ ኢትዮጵያ የምታመርተውን ታዳሽ ኃይል ለመጠቀም ያላቸው ፍላጎት እየጨመረ መሆኑን ገልጸዋል።

በቀጣይ አረጋቱ የጠየቁትን የኃይል ፍላጎት ለማቅረብ ተጨማሪ መስመሮችና የማከፋፈያ ጣቢያዎችን ለመሥራት ጥናት እየተደረገ መሆኑንም ጠቁመዋል።

እንደ ኢንጂነር አዜብ ገለፃ 200 ሜጋ ዋት ኃይል ፍላጎት ላላት ኬንያ ኃይል ለመስጠት የመስመርና የማከፋፈያ ጣቢያ ግንባታ ፕሮጀክት ተፈርሞ ወደ ሥራ ተገብቷል።

ኢትዮጵያ ለጎረቤት አገራት እያቀረበች ያለችው የኤሌክትሪክ ኃይል የአገራቱን ኢኮኖሚያዊ ግንኙነት በማጠናከርና የልማት ትስስሩን በማፋጠን ላይ ይገኛል።

ግንባታው በቅርቡ የተጠናቀቀውና 1 ሺህ 870 ሜጋ ዋት ሃይል የማመንጨት አቅም ያለው ጊቤ ሦስት ሃይል ማመንጫ አሁን ላይ 900 ሜጋ ዋት እያመነጨ ነው።

በአሁኑ ወቅት ጊቤ ሦስትን ጨምሮ በአገሪቱ ያሉት ግድቦች የሚያመነጩትን አቅም ለመጠቀም የሚያስችል የሃይል ማስተላለፊያ መስመሮችና ጣቢያዎችን አቅም የማሳደግና አዲስ የመዘርጋት ሥራ በመከናወን ላይ ይገኛል።

ታላቁን የህዳሴ ግድብ ጨምሮ በግንባታ ላይ ያሉ ሌሎች ፕሮጀክቶች ሲጠናቀቁ ኢትዮጵያ ለሌሎች አገራት የምታቀርበው ኃይል እንደሚጨምር ይጠበቃል።

ኢትዮጵያ ከአፍሪካ ቀንድ ባሻገር ሩዋንዳና ብሩንዲ ለመሳሰሉ በጣም ውድና ታዳሽ ያልሆነ ኃይል ለሚጠቀሙ አገራት እንዲሁም ለሰሜን አፍሪካ፣መካከለኛው ምስራቅና አውሮፓ የማቅረቡ ዕቅድ አላት።

ታንዛንያ ከጅቡቲ፣ሱዳንና ኬንያ በመቀጠል ከኢትዮጵያ ኤሌክትሪክ ሃይል የምታገኝ አራተኛዋ አገር ትሆናለች።

 ከዚህ በላይ አደገኛ ቦዘኔነት፣ ከዚህ በላይ ሽብር ከወዴት ይገኛል!?
 

ፈይሳን አትንኩት!

14067671_1461358120547331_7833434000898986507_nI can’t keep the brave #FeyisaLelisa out of my mind, I can’t keep him out of my soul. It needs an altruist soul to forgo comfort zone to help the helpless, and to be voice to the voiceless majority. He could have lived in a selective ignorance, and act as if ‘nothing is wrong in the country’ as many have chosen.
 
In fact, he knew that it may cost him career, friends, families, and even breath; as even simple trial of exercising freedom of speech may cost career, freedom of movement, close friends (that play ‘I hate politics’ and/or ‘I am neutral’), neighbors, and life. But he has loved the people, and choose to submit for his own conscience.
 
It is just one of the simplified and contemporary forms of Walk of Jesus. His courageous selfless act is an ever inspirational deed to a generation in general. This is what ‘living well’ means!, what ‘living to the fullest’ means. ‘Thank You’ is an understatement. May his kinds of souls multiply in all sectors. May God be with him and his loved ones throughout.
አትንኩት!
——
ሚዛን ነው – ለክብር
መስፈሪያ – ለፍቅር፣
ፈዋሽ – ከበሽታ፥
አበባ – ለደስታ፤
ምውት – ለእምነቱ፣
ታዛዥ – ለስሜቱ፤
 
ይልቅ ተንጋግታችሁ፥
ቅሰሙ፣ ተማሩ፣
በእጁ ይዳብሳችሁ፣
ተሰለፉ ከእግሩ፤
 
በየቦታው ይኑር፥
ሁሉም በየግብሩ፣
የተከሉት ይመር፣
ይታከም አገሩ፤
 
ስለሕዝብ ማቃሰት፣
ዓለም ደስታን ትቶ፥
ስለአገር መዋተት፣
ቤት ንብረት ረስቶ፥
 
ማሰማት እሮሮ
ባልጠነከረ ልብ
ባልሰላ አእምሮ፥
አይገኝም ከቶ!
ደርሶ ካላሳየን፥
ድንገት ሰው ተነስቶ!
 
“ሃምሳ ሰው ቢወለድ
ሃምሳ ጉድ ይመጣል”
 
ሃምሳ ጀግና ቢወድቅ
ሃምሳ ሺህ ይነሳል፤
 
ሃምሳ ዘር ቢበተን
ማሳ ሰብሎ ያምራል፤
 
ይኸው በዚህ ጊዜም
በአንዱ ሰው ፈይሳ
ሺ ልሳን ተነሳ፣
 
በደልን ምለሳ፣
ግድያን ወቀሳ፣
አፈናን ፍወሳ፣
ጭቆናን ምየሳ።
 
/ዮሐንስ ሞላ/

ሰማዕቱ እርገጤ…

አንድ ፍሬ በቅሎ ምድርን ያመሳት፣
እርገጤ ነበረ፥ ‘ሰይጣን በከረባት’
አካባቢው ላይ ውስጥ ውስጡን የነበሩ “እድሩ ይፍረስ ” የሚሉ ድምጾች በይፋ መሰማታቸው ቀጠሉ። የእድሩ አመራሮችም ሥራ አስፈጻሚ አባላቱን በጥሩንባ እና በመሰል የእድሩ ጯኺ ንብረቶች ታግዘው፣ የቀዬውን ጆሮ ከማዘናጋት አንስቶ በሚቻለው ሁሉ ነገሩን ማለባበስ፣ አፎቻቸውን ማበስ እንደሚኖርባቸው ትዕዛዝ ሰጥተው ደፋ ቀና ይላሉ። እድርተኛውን ያነቃው ‘የጎረቤት እድሮች፣ የሰርግ እቃ አከራዮችና የሰርግና ምላሽ ወጣኞች ሴራ ነው’ እያሉም ያወራሉ። ይህን ያህል ንቀውታል!
 
በየቦታው “እድሩ ብዙዎችን ቤት አልባ አድርጓል፣ መዝገብ ያዥነትና ጥሩንባ ነፊነት እንኳን ሥራ ማስያዝ ባለመቻሉ ሰዎች ከቀዬው እየተሰደዱ ነው፣ ግማሾቹም በእስርና በተስፋ መቁረጥ ነው ያሉት። ከጥሩንባ ነፊዎቹ በቀር አፋችንን ለጉሞናል። ድንኳን ጥገናውና ምስር ለቀማው ሳይቀር በወገንተኝነት እና አባላት ለእድሩ ባላቸው አቋም የተነሳ ነው የሚሰጠው፣ የእድሩ ቋንቋ ተናጋሪዎች የአመራር ቦታዎቹን መያዛቸው ሌላውን ጎድቶታል፣ የእድርተኞቹን የማንነት ጥያቄና የዝምድና ሁኔታ በአግባቡ አልመለሰም፣ ወላ የአባላቱን ሚስቶች አመራሩ ካልወሸምኩ ይላል፣ እድሩን ወደ አንድ ቤተሰብ የመውሰድ አዝማሚያ ይታይበታል፣ ወዳጆቻችን ለእድሩ እድሜ መርዘም ተብሎ እየተገደሉና እየታሰሩብን ነው። እድሩ ሞታችንን እንጂ ሌላ ምንም አይፈልግም። በየለቅሶ ቤቱ የፍራሽ ተሰብስበን ስንቀመጥም መከልከል ጀምሯል። ይፍረስልን!” የሚሉ መልእክቶች ይስተጋባሉ።
 
ከቁጩ ባለራዕዩ ኮሚቴ ደግሞ “የእርገጤን ራዕይ እናስፈጽማለን። ከምንግዜውም በላይ የእርሱን አደራ ተቀብለን ብዙ ሰዎችን በመግደል የእድሩን ህልውና ማስጠበቅ ያለብን ሰዓት ላይ ነው የምንገኘው። ትምክህተኛ እና ጠባብ እድርተኞችን ሳንሰማ በምንታወቅበት የጭካኔ እና የግድያ ሞያ ላይ አቅማችንን ማረጋገጥ ይኖርብናል። ፍትሀትና የቀብር ፀሎት ፈጻሚ የሀይማኖት አባቶችን በሾርኒ ልከን ከአባላቱ ጋር ሰላም የተፈጠረ በማስመሰል አዘናግተን እንዳይለመደው አድርገን እናዳፍነዋለን።
 
ስህተት እንዳንሰራ! በሰላም መፍታት የእኛ እድር ባህል አይደለም። የእርገጤ አጥንት ይወጋናል። እርገጤ በእኛ ዘንድ በተሰጠው የቅዱስነት ማዕረግ የተነሳም አባላቱ ‘ተገለጠ’ ቢባሉ ስለሚያምኑ በጥሩንባ ነፊው በኩል በወቅቱ ሁኔታ ላይ ንግግር አደረገ ብለን እናሰራጫለን። እንግዲህ አመራሩ ከሌለ እድሩ ይፈራርሳልና ለራሳችን ብለን መንቀሳቀስ አለብን። እድሩ በቀብር ስራ ሲጠመድ ሁሉም ቦታ ቦታው ይገባል።” በማለት ተነግሮ ለተግባራዊነቱ ዋተቱ።
 
* * *
 
ሲተኮስ አድሮ ዋለ።
 
ከእድርተኞች ወገን
 
ብዙ ሰው ሞተ!
 
ብዙ ሰው ቆሰለ!
 
ድምጹንና ዋይታውን የሰማ ብዙ ሰው ተነሳ!
 
እኔ በክላሲካሉ ታጅቤ እንቅልፌን ተኛሁ።
 
ከአመራሮቹ ወገን ደግሞ ከመግደልና ከመደብደብ ከተረፈ ጉልበት፣ ለድግስ ሲተራመስ ነው ያደረው። ድስቱ ሲንጋጋ፣ ጭሱ ቤቴን ሲያውደው ልስማ እንጂ ምን እንደሆነ አላወቅኩም ነበር።
 
* * *
 
“ተነስ ዛሬ ስራ የለም። እርገጤ የዓመት ናቸው! እስኪ ደጃቸውን ስመን እንምጣ።”
 
“የምን ደጅ… ” አልኩ በእንቅልፍ ልቤ።
 
“የሰማዕቱን እርገጤ ነዋ። ተነስ በረከታቸው ያድርብናል።”
 
“አድሮብን የለ? ብዙ ሞቶ፣ ብዙ ቆስሎ አደርን እኮ።”
 
“እርገጤ ይገስጹህ!” ብላ ሽጉጧን ስትፈልግ ተነሳሁና ጥቁር ልብስ ሳጣ ያገኘሁትን ለብሼ ወጣሁ።
 
መንገድ እንደጀመርን ስለሰማዕቱ የሰማሁት ትዝ አለኝ። እሳቸው በሞቱበት ቀን ነጭ የለበሱ ‘መናፍቃን’ ላይ የሆነው ትዝ አለኝ። ነጭ የማንለብስበት የእርገጤ ንግስ ቀን መሆኑ ትዝ አለኝ። በራዕያቸው መሰረት የሚፈስ ደም ፈልጌ ልብሴን አቀለምኩትና እፎይ ብዬ ከምዕመኑ ጋር በቀይ ተቀላቀልኩ።
 
* * *
 
አቶ እርገጤ በአንምባገነንነታቸው የታወቁ የእድሩ ዳኛ ነበሩ።
 
ሰዉን ሁሉ ሰጥ ለጥ አድርገው ገዝተው መዋጮዎችንና ድጎማዎችን ያሰባስቡ ነበር።
 
ምላሳቸውም ረጅም ስለነበረ ነገሩን ሁሉ አሳስረው ቁጭ ያደርጉታል።
 
ሲገድሉ፣ ሲያስሩ፣ ሲያባርሩ፣ ሲያቆስሉ፣ ሲያስለቅሱ፣ ገንዘብ ሲሰበስቡ… ኖረው ኖረው፣ ከዕለታት ባንዱ ቀን እንደማንም ሞቱ ተባለ።
 
ሰፈሩ በዋሽንት ዜማ ደነቆረ።
 
ሁሉም እየወጣ ደነከረ።
 
የለቅሶው ጉብኝት እስከ ግምጃ ቤት ድረስ ክፍት ሆኖ ነበር። የለቅሶ አዋጅ ተጠርቶ ግማሹ የሞተበትን እያሰበ፣ ግማሹ ኑሮውን እየሳበ፣ ቀሪው ደግሞ ዝም ብሎ በማስመሰል ደረቱን ደቃ። ፀጉሩን ነጨ። እንባ ረጨ። በእድሩ የተረሳው ሁሉ “እኛን ለማን በትነውን?” ብሎ አለቀሰ።
 
ዓመት ተከበረ።
 
2 ዓመት ተዘከረ።
 
3 ዓመት ተጨፈረ።
 
4 ዓመት ተደነከረ።
.
.
.
እድሩ ፈርሶ መንፈሳቸው በገዳይ አመራሮች ላይ አደረ። ራዕያቸውን ወንጀለኞች
ወረሱት። ሽፍቶች ይዘውት በየጫካው ገቡ።
 
* * *
 
እግዜር ነቀለዎ፣ ቁርጥ ቀንዎ ደርሶ፣
ሰምሮልዎት ሳያዩ፣ አንድነቷ ፈርሶ፤
ስር እየሰደደ፣ ሕብረቷ ታድሶ፥
ሲረግጧት ኖራለች እንኳንስ ያለርሶ፤
የበተኑት ክፋት፣ የዘሩት አብቅሎ
ደም ሲያላቅስ አለ በየደጁ ሾሎ፤
ራዕይውንማ ሰይጣንም ይጽፋል
መተኮሱንማ ሽፍታም ይተኩሳል፣
ሞቶ አልሞት ያለ ግን እንደርስዎ የታል?
ዓለሜ ነበረ፣ እልል በቅምጤ
ከስር ተመንጉሎ ቢነቀል እርገጤ።
በሚል እንጉርጉሮ ታጅቦ ሰፊው ሕዝብ አመራር ዘመዶቻቸው ከጻፉት ገድል ላይ መርጦ ገደላቸውን ያነባል። በደላቸውንም በልቡ ይጽፋል።

ብርሃን፣ ግንቦት 8 እና ናፍቆት…

እናፍቃለሁ… የውዳሴ እና የምስጋና ግጥም የምጽፍለት መሪና ስርዓት እንድናገኝ። እኩል ተወዳድሬ የምሰራበትና፣ በታማኝነት “ይኸው ይሄን ያህል ገቢ አገኘሁ። ተመኑን ቁረጥና አገሪቷን አቅናበት፣ ሕዝቡን አንቃበት።” ብዬ የምገብርለት ስርዓት፥ ካፌ ቆጥቤ በሰጠሁት ብር ዱላና መሳሪያ ገዝቶ፤ በጠራራ ፀሐይ በ“ለምን አየሁህ” ደምፉ፣ ሕዝብ የሚደበድብበት ወግ የሚቀርበት ቀን ይናፍቀኛል።
 
በሰላም ወጥቶ መግባት፣ በስርዓት መኗኗሩ፤ …ማንበብና መጻፍ መቻሌን ማማረር፣ ማየትና መስማቴን መራገም የማቆምበት ቀን፤ …በገዛ መኝታ ቤቴ ስነቃ፣ በገዛ አገሬ ጎዳናዎች ስራመድ እንግዳነት የማይሰማኝ፤ …በነጻነት ስሜት፣ የነጻነትና የፍቅር ግጥሞችን ብቻ የምጽፍበት ቀን ይናፍቀኛል። ጥበቃዬ ከዳር ደርሶ፣ መገናኘትን ማንቆላጰስና፣ የሰው ልጆችንና መኖርን ማወደስ እናፍቃለሁ።
 
ያረገዘች በሰላምና በጤና የምትገላገልበት፣ የተወለደ የሚያድግበት፣ ያደገም የነፍሱን መሻት የሚከውንበት፣ ሰው ተምሮ የሚያገለግልበት፣ በስተርጅናም በክብር ቆይቶ በደስታ የሚሰናበትበት ኑሮ እናፍቃለሁ። ፅዱና አረንጓዴ አዲስ አበባና ሌሎች ክፍላተ አገራት… ተመጥኖ በተሰጣት ቀንና ማታ ለ13 ወራት በጸሐይ አሸብርቃ፣ መስከረም ሲጠባ አደይ አበባና የመስቀል ወፍ የሚያጌጡባት ዘረኝነት ያላጠቃት ኢትዮጵያ ትናፍቀኛለች። ወጣቶች በተስፋ መቁረጥ የማይኖሩባት፣ እናቶች ለልመና የማይወጡባት፣ ህጻናት በየጎዳናው የማይበተኑባት አገሬ ትናፍቀኛለች።
 
ይገርመኛል፥ “መጽሐፎችህ ጨለምተኞች ናቸው” ሲሉኝ፤ “ግጥሞችህ፣ እንዲሁም ፌስቡክ ላይ የምትለጥፋቸው ጽሁፎች ጨለምተኞች ናቸው።” ሲሉኝ። ኑሮዬን የሚያውቁት ይመስል ቀለምና የብርሃን ዓይነት ሲመርጡለት ሳይ ይገርመኛል። “እንዲህ አጠቋሩረኸው ስታበቃ “የብርሃን” ማለትህ ሽሙጥ ነው?” ይሉኛል፤ …ብርሃን መውደዴን፣ ብርሃን መናፈቄን ሳያውቁ። ሀሳቤን መግለጼን እንጂ፥ መንጻት፣ መጥቆራቸውንስ አውቃለሁ? ብርሃንን መተረክስ አይቀልም?
 
ደግሞ “ጆ ሁለቱንም መጽሐፍቶችህን በ3 ዓመታት ልዩነት ልክ ግንቦት 8 ያደረግከው ለምንድን ነው?” ተብዬ ለብዙኛ ጊዜ ተጠየቅኩኝ። ባጋጣሚዎች ሳልመልሰው ያልፋል። ምክንያቴን የልደት ቀኗ ግንቦት 8 ለሆነችው ወዳጄ Kal Kidan ብቻ ነበር ነግሬያት የማውቀው። “የ1981 ዓመተ ምህረቱ መፈንቅለ መንግስት ናፋቂ ሆነህ ነው እንዴ?” ብሎ ያስፈገገኝም አለ። ዛሬ ላውራው እስኪ…
 
“ብርሃን ብርሃን” ማለቴ፣ መጽሐፎቼን ግንቦት 8 ለማስመረቅ መፈለጌም፥ በግንቦት 7 ቀን፣ 1997 ቁጭት የተደባለቀበት ትዝታ ነው። ብርሃን ናፍቄ ነበር። ‘ምርጫው ለውጥ ያመጣልናል፣ ከዴሞክራሲ ጋርም ያስተቃቅፈናል’ ብዬ፣ በከፍተኛ መጓጓት እና መቁነጥነጥ ውስጥ ሆኜ ነበር ደርሶ ማለፉን የምጠብቀው። ሰው ለመምረጥ እንደዚያ ይስገበገባል?? (ዴሞክራሲ ግን ለምን የማናውቀው ቦታ የሄደብንና መምጫውን የማናውቅ ዘመድ ይመስለኛል?)
 
የግንቦት7 ማግስት…ግንቦት 8ን ለብስራት ነበር ያለምኳት፤ ለለውጥ እና ለነጻነት ግጥሞች ነበር ተስፋ ያደረግኳት፤ ለመተቃቀፍና በደስታ እንባ ለመራጨት ነበር ያሰብኳት። የብርሃን ነዶዎች ዙሪያዬን እየከበቡ ያቃዡኝ ነበረ። በኑሮዬ ጣሪያ ቀዳዳዎች ሾልከው ሾልከው ወለል ላይ የቆሙ የብርሃን በትሮች፥ የተስፋ ምርኩዝ ሆነውኝ ያጽናኑኝ ነበረ። እንደ“ይቺን ብላ! ዶሮ ማታ”… ‘ሲነጋ ባህሩ ይከፈልልንና ተሻግረን አገራችን እንገባለን።’ እል ነበር ለራሴ።
 
ፍትህ ተከብሮ፣ ሰዎች ዋጋ እንደተከፈለባቸው በክብር ሲኖሩ እየታየኝ ብቻዬን ያስወራኝ እንደነበረ የትናንት ያህል ትዝ ይለኛል። እኩል፥ ልቀላቀል የምችለው ከሙስና የፀዳ የሥራ ዓለምና መመረቄም ይናፍቁኝ ነበር። በልቤ፥ የምጽፋቸውን የደስታ ግጥሞች እያሰብኩ በቀብድ ‘poegasm’ ላይ ደርሼ አውቃለሁ። …ይናፍቁኛል እነዚያ ጊዜያት! ወደው የማያገኙትን ሰው ሲጠብቁ፥ ቁርጡ ቀን ባያልፍ ያስሸልላል። የወዳጅ ዘመድ “አይዞህ”… “እየጠበቅኩ ነው” የማለት ማጽናናት ጫፍ ላይም አይደርስም።
 
ሲነጋ ግን እንዳይሆኑት ሆኖ ዛሬም ድረስ “እህህ” እያስባለን ያለ ነገር ተከሰተ። ጭራሽ 5 ዓመት ተቆጥሮ ጉድ አፍርቶና ጎምርቶ “100% ተመርጠናል” ብለው አረፉት። ይኸው ቀን ጠብቆ የታፈኑ ድምጾች በየቦታው ስርዓቱን ሲያወግዙ ተሰሙ። ምላሹም “እንካ ቅመስ” ሆነ። በጸሐይ ደም የትም ፈሰሰ። እስሩም ድብደባውም በገፍ ሆነ።
 
ሆኖም፥ “ኧከሌ ታሰረ” ሲባል፥ “አርፎ አይቀመጥም ነበር።” ይሉ የነበሩ ሰዎች ዐይናቸው ተገለጸ። “እነ ኧከሌ በጸረ ሽብር አዋጁ ክስ ተመሰረተባቸው” ሲባል “የሆነ ነገር ሳያኖርማ…” ይሉ የነበሩ ሰዎች ከእውነታው ጋር ተፋጠጡ። “ፖለቲካና ኤሌክትሪክ በሩቁ” የሚሉ ወዳጆች፥ በግድ ዙሪያቸው ስለሚከናወነው ነገር ማወቅ፣ መጠየቅና ምሬትን መግለጽ ጀመሩ። የጭቆና መብዛት፥ የግዱን የነዋሪዎችን ዐይን ይገላልጣል።
 
ይኼ እንደ ጥሩ ጭላንጭል ኾኖ ያጽናናል እንጂ፥ የተደረገብን ነገር፣ ለመናገር ያከብዳል። ዝም ለማለትም ይጨንቃል። መናፈቅ ግን አይከለከልም! …ዛሬም ብዙ ብዙ ነገር እናፍቃለሁ! ጊዜና ባለጊዜ አልፈው፥ እንደምርጫ 97 ተስገብግቤ ቀበሌ ሄጄ የምመርጥበት ሰልፍና፣ በልቤ ስዬው እንደነበረው ዓይነት የምርጫ ማግስት እናፍቃለሁ!
 
አንሙትማ!

“ሳይቃጠል…”

13939360_1032565160197850_3393683655956488976_nእንግዲህ ጫፍ ጫፉን እንዳየነው፥ ቢችሉ ኖሮ ፌስቡክም ላይም አጋዚ በትነው የንጹሐንን ደም ያፈሱ ነበር። ስጋን ይገድላል እንጂ፥ ነፍስን እንደው ማንም አያገኛትም! ይኸው ከያዙት መሳሪያ ብዛት የሚያርዳቸውም የመረጃ እና የሀሳብ ልውውጡ ነው።
 
መቼም ከዛሬው “ሳይቃጠል በቅጠል” እና ከሰሞኑ የኢንተርኔትና ማኅበራዊ ድረገጾች አፈና የምንማረው፥ ማኅበራዊ ድረ ገጾች (በተለይም ፌስቡክ) እንደሚያጣጥሉት፣ ከቁብ የማይቆጥሩት ሳይሆን፣ በጣም የሚፈሩትና ሕዝብ በማንቃት እነሱ የፈጠሩትን የመረጃ እና የመማማር ክፍተት የሚሞላ መሆኑን… ያም በጣም የሚያስጨንቃቸው እንደሆነ… እኛም ብንሆን ስለብዙ ነገር ብዙ የምንልበትና፣ ብዙ ነገሮችን ለማየት የምናጮልቅበት መስኮታችን በመሆኑ፥ ከምንግዜውም በላይ፣ በሀላፊነት እና በጥንቃቄ በመጠቀም ጋንጩራቱን በቀላሉ ማንጨርጨር እንደምንችል ነው። በተለይ በዚህ የግል ፕሬስ ድርቀት ባለበት ወቅት የፌስቡክ አስተዋጽኦ ጉልህ መሆኑን ትኩረት ማድረግ እንደሚገባን ነው።
 
የለበጣ ተጠቅመን እንዲህ ያራድናቸውማ፣ ቅርጽ ቅርጽ ስንይዝ፣ ወሬያችንም ደርዝ ደርዝ ሲያበጅ፣ ቃላቶቻችን የተመረጡ ሲሆኑ፣ የውይይት ባህሉም ሲደረጅማ ጨርቃቸውን ጥለው ያብዳሉ። ዩኒቨርስቲ እያለን የተማሪ አመጾች ሲኖሩ ከማይረሱ የተማሪ ድምጾች መካከል ይህቺ ዝማሬ ነበረች። (ሀዋሳ የተማራችሁ ታውቋታላችሁ።)
 
ጥያቄያችን ኦሆ… ይመለሳል ኦሆ፣
ይመለሳል… ኦሆ!
ባይመለስ ኦሆ… ጉድ ይፈላል ኦሆ፣
ጉድ ይፈላል ኦሆ
እኛ ያለን ኦሆ… ወረቀት ነው ኦሆ፣
ኦሆ ወረቀት ነው!
የእናንተ ግን ኦሆ… መሳሪያ ነው ኦሆ
መሳሪያ ነው!
እንግዲህ ከቻሉ የንጹሐኑን ስጋ ትተው ሀሳቦችን ይቀጥቅጡ። ሀሳቦችን ይግደሉ። ጥያቄዎችን ያሰቃዩ። የንጹሕ ሰው ደም እንደው አንዱ ቢነካ ሺውን ይቀሰቅሳል! አንዱ ቢወድቅ እልፍ ሆኖ ያፈራል! ሰማየ ሰማያትን ሰንጥቆ ያስተጋባና አማልክቱን ያስቆጣል!
 
#EBC: Thank you for stressing on the fact that our cyber existence is stressful to the brutal government; and our proper usage matters towards the different kinds and levels of changes we seek. ሰሞኑን በተሰራው ማስታወቂያ መሰረት ብዙ አዳድዲስ የፌስቡክ አባላት እንደሚመጡ እናምናለን። (ልማት ቅብርጥሶ ለማለት የሚበተኑትንም ጭምር) I hate you tho. #IHateEtv!
 
#Bullies: come, try the ideas! Fight with the minds of the oppressed majority!
 
#Friends: ከአብዮተኛው ፌስቡክ ጋር ወደ ፊት (Y) (Y) Let’s socialize in a way that we can sustainably desocialize violence and oppression from our beloved country!
 
#Ethiopia #StopKillingCivilians

ለሚመለከተው ብቻ

በትጥቅ ትግል አምናችሁ አባል የሆናችሁበት ወይም በተግባር የምትደግፉት ፓርቲ ለሌላችሁ ከኢትዮጵያ ውጪ የምትኖሩ ዲያስፖራ ወዳጆች… የኢትዮጵያ ምድር እንዲህ በደም እና በእንባ ቅይጥ እየታጠበች፣ ሰላማዊ ሰው እንደቅጠል እየረገፈ፣ ሰላም ፍለጋ የወጣው ሰው ደሙ ፈስሶ የትም እየቀረ፣….
 
“የአገሬ ወጣት ሆይ ስማኝ። ሀይልህ በእጅህ ነው። እንዳትመለስ። በለው። ፍለጠው። እስከመቼ ሲገድሉህ ዝም ትላለህ? በል ተራው ያንተ ነውና ግደል! ሊመታህ የመጣውን ቀድመህ ምታው።” ብሎ መምከር የምትጽፉትን ያህል ቀላል ነው? እንደኳስ፥ በስልክ ተቀርጾ በተላለፈ ‘ወጣቶች ከፖሊስ ሲሸሹ የሚታይበት’ ቪዲዮ ላይ፥ – “አዪ… በለው! በለው! ወደ ግራ፣ ወደ ቀኝ… ለምን ሸሸህ? ባትሮጪ እኮ ፖሊሱ ይስትሽ ነበር። ስለዚህ ዱላውን ትቀሚው ነበር።” ዓይነት የኮሜንታተር ሚና መውሰድ አይከብድም?
 
ያንን ለምን እዚያው በአካል ያለው ሰው እርስበርሱ አይባባለውም? ነው እንጂ፥ ልክ ነው ልክ አይደለም እያልኩ አይደለም። እነሱ ወደው ፈቅደው ሲያደርጉት “አታድርጉ” ማለት አይሆንም። ነገር ግን፥ የሁኔታውን ምስል ለመከሰት እንኳን ምቹ ባልሆነበት ርቀት ላይ ሆነው፥ እንዲህ ያለ አዝማችነት አይከብድም ወይ?
 
ሰው አገር ስትኖሩ፥ የአገራችሁ ጉዳይ ሥራ አስፈትቷችሁ፣ ቀኑን ሙሉ እሱን ስታስቡና ስታሰላስሉ ለመዋል እንደማትችሉ ግልጽ ነው። ረጋ ባለ ምድር ላይ ንጹህ አየር ስትተነፍሱ እና ስትንሸራሸሩ ውላችሁ፥ እንደ መደበሪያ ፌስቡክ ላይ ብቅ ስትሉ ብቻ…… “አትነሳም ወይ! ድል የሕዝብ ነው። ሕዝቤ ሆይ ስማኝ፥ ተጋፈጣቸው። አውሬዎቹ ቢገድሉህም ታሪክ ይፋረድሃል።” ብሎ የታጋይ እንቅልፍ መተኛት አይከብድም? ቀኑን እንዴት ነው የምታሳልፉት? ምሽቱንስ?
 
ደሙ ሲንዠቀዠቅ ፎቶ ተነስቶ፣ በማኅበራዊ ትስስር ድረገጾች ላይ ደሙ ደግሞ ደጋግሞ ሲፈስ የሚውለውን ሰው ፎቶ ከማጋራት ባሻገር፥ “ቁስሉን መጠገኛ።” የሚሆን እንኳን “ምን ላድርግ?” ሳይሉ፥ የሞተውንም እንዲሁ፣ ለቤተሰቦቹ ክብር ተብሎ እንኳን ፊቱ ሳይሸፈን፣ እንዲሁ ብቻ ከሩቅ ሆኖ እየተቀባበሉት ሆይ ሆይ ሲሉ መዋልና፣ እሱን ‘አክቲቪዝም ነው’ ብሎ ማለፍ ብቻ ከባድ አይሆንም?
 
እንዲህ ባለ ቀውጢ ሰዓት፥ የስጋ ወንድሞቻችሁ/እህቶቻችሁ ጋርስ ደውላችሁ “በሉ ሰብሰብ በሉ። አርፋችሁ ቁጭ በሉ። የወያኔ ሲሳይ እንዳትሆኑ። መቼስ እግዚአብሔር ያመጣውን እሱ እስኪመልሰው ድረስ።” ብላችሁ ታስጠነቅቃላችሁ? ወይስ እንደፌስቡኩ ሁሉ “አንተ ሽንታም! አትወጣም ወይ? ሂድና ግደል ወይም ለነጻነትህ ሙት” ብላችሁ ታጀግናላችሁ?
 
እሺ ይሄም ይቅር። ያላችሁ የነጻነት ጥማት “በለው በለው” ከሚለው ድምጻችሁ ውስጥ ፈልገን እንስማው። ታዲያ ግን፥ በትጥቅ ትግል ማመናችሁ ካልቀረ፣ እንዲህ በሩቁ “በለው በለው” ከማለት ቀረብ ብሎ ትግሉን መቀላቀል እንዴት አላሰባችሁም? ከፌስቡክ ታጋይነት ባለፈ ማለቴ ነው። ለምሳሌ፥ ወደአገር ቤት ሄዶ፣ ራሱን መስቀል አደባባይ ላይ አቃጥሎ ዜና እንዲሰራለት የማድረግ ዓይነት ታጋይነት? ወይ ደግሞ፥ ጠቅልሎ ሄዶ ባገኙት አጋጣሚዎች ሁሉ ከፌደራል ፖሊሶች ጋር ፊት ለፊት የመመታታት ዓይነት ታጋይነት? “ሽንታም” ማለቱ እንደሚቀላችሁ ሁሉ፥ የእናንተን ጀግንነት ደማችሁን እያፈሰሳችሁ ማሳየት?
 
እንደውም፥ ዲያስፖራው ሰብሰብ ብሎ ሄዶ ኢትዮጵያ ውስጥ ሰልፍ አድርጎ ሲተኮስበት ድንጋይ ወርውሮ የተወሰነው ደም ቢፈስ፣ ለሚዲያ ሽፋኑም ጠቅሞ ከፍተኛ የለውጥ ስትራቴጂ ሊሆን ይችላል እኮ! (አንድ ሰው ብቻውን ሰልፍ ቢያደርግ ትኩረት እንደሚስበው ሁሉ።) ለማታገሉም ቢሆን እንዲህ ከሩቅ ሆኖ አቅጣጫ ሲቀይስና አሰላለፍ ሲተች የነበረ ሰው ውጤታማ ሳይሆን አይቀርም።
 
ባጭሩ፥ ለምንድን ነው ወደ ኢትዮጵያ የማትሄዱት?? ምንድን ነው የቸገራችሁ? – የአውሮፕላን ቲኬት መግዣ?? እንዳትሞቱ/እንዳትታሰሩ ፈርታችሁ እንዳይባል፥ እዚያ የሚሞተውን ሰውም እየገፋፋችሁት ነውና እንደዛ አላሰብኩም። ማለቴ፥ ሕይወቱን ለነጻነት አሳልፎ ለመስጠት ዝግጁ ያልሆነ ሰው፥ እንዴት ሰዎች የራሳቸውን ሕይወት አሳልፈው እንዲሰጡ ከሩቅ ሆኖ ጥሪ ያቀርባል??
 
ሌላ በጣም በሚደንቅ ነገር ደግሞ አክቲቪዝሙን ስታደርጉ፥ አሁን ላይ እንኳን፥ “እኔ አገሬ መግባት እፈልጋለሁ ባክህ” ብላችሁ በራሳችሁ ስም ሳይሆን፣ በanonymous ስም የምትጠቀሙ መኖራችሁ ነው። ጥቃት መርሮት የወጣን ሰው ፎቶ ለአክቲቪዝም መጠቀም አግባብ ከሆነ፥ የራስን ስም ለአክቲቪዝም መጠቀም የሚከብደው ለምንድን ነው??
 
እንዲህ በትጥቅ ትግል እና በፈለገው ደም መፍሰስ ለውጥ የምትፈልጉ ከሆነ፥ አገር ቤት መግባት ምንም ዓይነት ስጋት አያጭርባችሁም መቼም። (ከለውጥ በኋላ የምትኖረውን የተረጋጋች አገር ከመናፈቅ ወይም ዓለም ከማማለሉ በቀር? ወይ ደግሞ ከምትወዷቸው ቤተሰቦቻችሁ የመለየት ስጋት?) ታዲያ ለምን አትመለሱምና ትግሉን አትቀላቀሉም? ይህን ለማድረግ ጠብታ ሀሞት ካጣችሁ ደግሞ፥ ወይ ደግሞ ኤርትራ ሄዳችሁ ግንቦት ሰባትን ለምን አትቀላቀሉም? …በነገራችን ላይ፥ ቢያንስ እነሱ ጋርስ አባል ናችሁ? በገንዘብ ትደግፏቸዋላችሁ? ወይስ እንደተለመደው “ሁሉንም ማቃለል! የዕለቱን እሳት አይቶ ማቀጣጠል!” ነው መመሪያችሁ?
 
ክብር አገር ቤት ሆናችሁ ለመብታችሁ እና ለነጻነታችሁ መከበር ቆርጣችሁ ለቆማችሁ፣ በምትችሉት ሁሉ ግፍን ለምትቃወሙ! የደማችሁ መፍሰስ በከንቱ እንዳይሆን፥ ፈጣሪ ያግዛችሁ! ሰላማችሁ ይብዛ!
 
ክብር ሰው አገር ሆናችሁ በምትናገሩት የለውጥ መንገድ ሁሉ በተግባር ለምትኖሩ!
 
#Ethiopia #EthiopiaProtests #OromoProtests #AmharaProtests #StopKillingCivilians